د اسلامي امارت مشر شیخ هبةالله اخوندزاده د اسد ۲۴مې په مناسبت کندهار کې جوړو شویو مراسو ته د خپلې وینا پر مهال ویلي، چې د اوسني نظام په څېر بل نظام په تېرو سلو کلونو کې په افغانستان کې نه دی حاکم شوی.
نوموړي د خپلو خبرو پر مهال زیاته کړې، چې د هېواد په ۳۴ ولایتونو کې ټول خلک د اوسني نظام تر چتر لاندې ژوند کوي او په خبره یې دا نظام په جرمني یا بن کې نه دی تشکیل شوی بلکې په هېواد کې د ننه رامنځ ته شوی او وزیران یې هم همدلته انتخاب شوي دي.
د ده په وینا، “موږ ولیدل چې تېر حکومت یو والي یا یو وزیر نه شو لرې کولی او ارګ کې یو حکومت او سپېدار ماڼۍ کې بل حکومت اعلان شو.”
د اسلامي امارت مشر د خپلو خبرو پر مهال څرګنده کړه چې د وزیرانو شورا لخوا نوموړي ته وړاندیز وشو څو د زمري ۲۴مه د ازادۍ د ورځې په نامه ونوموي او دغه راز یې نمانځنې ته باید ۵۰۰ میلیونه افغانۍ ځانګړې شي.
خو د اسلامي امارت مشر وايي، ده یې په ځواب کې وویل چې دا ورځ باید د فتحې د ورځې په نوم ونمانځل شي. د نوموړي په وینا په دې ورځ اشغالګر چې په راس کې يې امریکا وه، د مجاهدینو د قربانیو او سرښندنو په پايله کې مات شول.
هغه دا هم وویل چې ددې ورځې د نمانځنې د لګښتونو په اړه یي د وزیرانو شورا وړاندیز هم رد کړ او ویې ویل چې چې باید د ډېرو لګښتونو څخه ډډه وشي.
نوموړي دغه راز زیاته کړه، نړیوالو تېر حکومت په رسمیت پېژندلی و په داسې حال کې چې په ټول افغانستان یې حاکمیت نه درلود خو په خبره یې، دوی اوسنی حکومت چې د افغانستان په لوېشت لوېشت خاوره حاکم دی، په رسمیت نه پېژني.
نوموړي زیاته کړه چې خلک باید د ده اطاعت وکړي.
د اسلامي امارت مشر په شهیدانو چوک کې له یو شمېر هېوادوالو سره هم له نیږدې لیدلي دي.
