د ا.ا ټولګټو وزیر، محمد عیسی ثاني د کندهار ولایت په سپینبولدک ولسوالۍ کې د اته کیلومتره سړک له رغنیزو چارو لیدنه کړې، او کاري بهیر یې ارزولی دی.
د دغه وزارت ویاند، محمد اشرف حقشناس په اېکسپاڼه لیکلي چې ښاغلي ثاني د یو تخنیکي پلاوي په ملتیا د یاد سړک چارې ارزولې، او د پروژې تطبیق کوونکو ټیمونو او د قراردادي شرکت مسوولینو ته یې د کار چټکتیا، غوره کیفیت، په پروژه کې د معیاري موادو کارونې او په ټاکلي وخت بشپړېدو په اړه سپارښتنې کړې دي.
محمد اشرف حقشناس ویلي چې د کندهار ولایت سپین بولدک ولسوالۍ دغه سړک شاوخوا ۸ کیلومتره اوږدوالی او ۶۰ متره پلنوالی لري چې په څلورو لینونو کې رغول کېږي.
د خبرپاڼې له مخې چې د سړک په جوړښت کې اصلي او فرعي سړکونه، منځنی ګلدان، د فرعي سړکونو ګلدانونه، د دواړو غاړو پیادهروونه او د اوبو لېږدولو ویالې شامل دي.
د خبرپاڼې له مخې چې یاده پروژه د ټولګټو وزارت او خصوصي سکتور ترمنځ د څه باندې ١ میلیارد او ٣٣٥ میلیونه افغانۍ قرارداد شوې ده چې رغنیزې چارې یې دا مهال د ٣٠ سلنه فزیکي پرمختګ سره په چټکۍ جریان لري.
