دې قوماندانۍ پرون شنبه د کب ۶مه په یوه خبرپاڼه کې ویلي چې د دغه ولايت په پښتون زرغون ولسوالۍ کې دوې ښځې له دوو نارينهوو سره له کوره د تېښتې او له واده مخکې اړیکې لرلو په خاطر نیول شوي دي.
د قوماندانۍ د خبرپاڼې له مخې، نیولشوو کسانو په خپل جرم اعتراف کړی او اوس په بندخونه کې دی.
په خبرپاڼه کې د دغو دوو ښځو د تېښتې د لامل په اړه څه نه دي ويل شوي.
مسوولینو د دې پېښې په تړاو نور جزییات نه دي ورکړي او نه هم د دغو مېرمنو د تېښتې لامل روښانه شوی دی.
تر دې وړاندې هم له کوره د تېښتې په تور د ښځو د نيولکېدو په اړه ډېر راپورونه خپاره شوي وو.
د یادولو ده چې د اسلامي امارت له واکمنېدو راهیسې په افغانستان کې له واده مخکې اړیکه غیراخلاقي کار بلل شوی دی.
