رسنیو راپور ورکړی چې ناپېژانده وسلهوالو د خیبر پښتونخوا په دېره اسماعیل خان کې د پاکستاني حکومت د مامورین په ګډون له ۲۰ ډېر کسان تښتولي دي.
د راپورونو له مخې چې دا کسان د انډس پر لویه لار تښتول شوي چې ځینې کسان پکې د بورې د یوې کارخونې کارکوونکي هم شامل دي.
په راپورونو کې د پاکستاني پولیسو په حواله ویل شوي چې دا پېښه د ښار شاوخوا ۳۵ کیلومترۍ کې د پاراوا پولیسو حوزې اړوند سیمه کې شوې ده.
تر اوسه د دې پېښې مسوولیت کومې وسلهوالې ډلې نه دی منلی.
دا په داسې حال کې ده چې څو ورځې مخکې په خیبر پښتونخوا کې له شلو ډېر پاکستاني پولیس د وسلهوالو له لوري تښتول شوي وو.
له تېرو څو کلونو راهیسې په خیبر پښتونخوا کې د پاکستاني حکومت پر وړاندې دا ډول پېښې زیاتې شوې او ترڅنګ یې بمي چاودنې، وسلهوالې نښتې او بریدونه هم زیات شوي دي.
د یادولو ده چې په خیبر پښتونخوا کې د ډېرو بریدونو مسوولیت تحریک طالبان پاکستان یا ټي ټي پي په غاړه اخلي.
