د ایران او پاکستان ترمنځ له دوو رسمي سرحدي لارو د سوداګري ځنډېدو وروسته په پاکستان کې د مایع ګازو بیه لوړه شوې، او پاکستاني سوداګر یې اندېښمن کړي دي.
د پاکستاني رسنیو د راپورونو له مخې چې د ایران او پاکستان ترمنځ له ګبد – ریمدان او تفتان رسمي سرحدي لارو سوداګري ځنډول شوې ده.
د راپورونو له مخې چې دا مهال د یادو سرحدي لارو دواړو غاړو ته د مایع ګازو، وریجو، تازه مېوو او نورو اړینو توکو سلګونه باروړونکي موټر او د څه باندې ۴۵۰۰ ټن مایع ګازو لېږدوونکي پاکستاني موټر په ایران کې بند پاتې دي.
پاکستاني سوداګرو ویلي چې له ایران سره د سوداګرۍ له ځنډېدو وروسته په پاکستان کې د مایع ګازو د یوې کیلو بیه په تېره یوه اوونۍ کې له ۱۰۰ پاکستانۍ کلدارې لوړه شوې ده.
د راپورونو له مخې چې د دې سوداګرۍ ځنډېدو مکتوب د پاکستان سوداګرۍ وزارت صادر کړی، خو د لامل په اړه یې څه نه دي ویل شوي.
پاکستاني سوداګر اندېښمن دي چې که سرحدي لارې بېرته خلاصې نه شي او د وارداتو بهیر عادي حالت ته راونه ګرځي، د مایع ګازو بیې به نورې هم لوړې شي.
