“ایران د افغانستان خلکو ته د وېزو په ورکولو کې ستونزه نه لري”

د ناروغانو د ویزې تمدید ستونزه باید جدي وکتل شي!

هلته د ویزې د تمدید په برخه کې ډېر خنډونه شته. هغه کسان چې ناروغان لري او د درملنې لپاره ایران ته ځي، دلته د ویزې اخیستو پر مهال ورته په قونسلګرۍ کې ویل کېږي چې هلته د ډاکټر د سپارښتنې او د درملنې د مودې له مخې ویزه تمدیدولی شئ؛ خو کله چې ناروغ هلته د تمدید مرکز ته مراجعه کوي، له یوې میاشتې زیات تمدید نه ورکول کېږي او ورته ویل کېږي چې بېرته خپل هېواد ته لاړ شئ، نوې ویزه واخلئ او بیا ایران ته راشئ.

موږ خپله د سرطان ناروغ لرو. په ایران کې ډاکټرانو ورته د شپږو میاشتو د درملنې موده ټاکلې، خو د ویزې د نه تمدید له امله ناروغ، سره له دې چې له سختې ناروغۍ او اقتصادي ستونزو سره مخ دی، مجبور شو افغانستان ته راوګرځي، بیا ویزه واخلي او بېرته د درملنې لپاره لاړ شي.

دا ستونزه یوازې د سفر ستونزه نه ده؛ د ناروغانو لپاره د درملنې بهیر ګډوډوي او پر هغو کورنیو چې لا له وړاندې په پورونو کې ډوبې دي، دروند مالي بار اچوي. ډېری دا کورنۍ په وطن کې له کرنیزو ځمکو، غوا او خوسې پرته بله د عاید سرچینه نه لري.

له اړوندو مسؤلینو څخه غوښتنه کوو چې د جدي او اوږدمهاله ناروغانو لپاره، په ځانګړي ډول د سرطان ناروغانو، د معتبر طبي اسنادو او د ډاکټر د سپارښتنې پر بنسټ د ویزې د اوږدمهاله تمدید ځانګړی اسانتیا رامنځته کړي.

ناروغ باید د خپلې درملنې په فکر کې وي، نه دا چې هره میاشت د ویزې د ختمېدو په اندېښنه کې وي.

الله تعالی دې د ټولو ناروغانو مل شي او ټولو اړمنو کورنیو ته دې اسانتیاوې برابرې کړي. آمین.