د روسیې پاور مشینز تخنیکي کمپنۍ مسوولینو د افغانستان برېښنا شرکت له رییس، عبدالحق همکار سره په کتنه کې پر بېلابېلو موضوعاتو خبرې کړې دي.
برېښنا شرکت لیکلي چې په دې کتنه کې د تولیدي فابریکو پر اساسي بیارغونې او تجهیزاتو نوي کولو خبرې شوې دي.
د افغانستان برېښنا شرکت رییس په هېواد کې د برېښنا تولید فابریکو اساسي بیارغونې، تجهیزاتو نوي کول او ظرفیت لوړونې برخو کې د پانګونې فرصتونو او آسانتیاوو یادونه کړې، او ډاډ یې څرګند کړی چې د افغانستان برېښنا شرکت له روسي پاور مشینز کمپنۍ سره د تخنیکي لومړنیو ارزونو برخه کې هر ډول همکاري کوي.
د خبرپاڼې له مخې چې بلخوا د روسي پاور مشینز کمپنۍ سوداګرۍ برخې مسوول «دینیس روداکوف» ویلي چې دوی غواړي افغانستان کې د شته تولیدي فابریکو لومړنۍ تخنیکي ارزونه وکړي.
د نوموړي په وینا چې له ارزونې وروسته به د اساسي بیارغونې، تجهیزاتو نوي کولو او ظرفیت لوړولو لپاره خپلې طرحې جوړې کړي.
د افغانستان برېښنا شرکت همداراز لیکلي چې افغانستان دا مهال د برېښنا یو شمېر فعالې تولیدي فابریکې لري، چې لنډ مهال کې یې د تولید پر زیاتوالي او تجهیزاتو پر نوي کولو په پراخه کچه کار شوی دی.
