د ایران بهرنیو چارو وزیر، سید عباس عراقچي وایي چې د «هرمز تنګي» د مدیریت په چارو کې لاسوهنه کړکېچ زیاتوي، او د دې سمندري لارې مدیریت یې یوازې د ایران مسوولیت بللی دی.
عراقچي دا څرګندونې په بغداد کې د عراق بهرنیو چارو له وزیر سره د ګډ خبري کنفرانس پرمهال کړې کړې دي.
د ایران بهرنیو چارو وزیر همداراز ویلي چې د واشنګټن – تهران د هوکړې له مخې د هرمز تنګي په بشپړه توګه پرانیستل د نورو هېوادونو نه، بلکې د ایران مسوولیت دی.
نوموړي خبرداری ورکړی چې که په دې برخه کې د کوم بل هېواد لاسوهنه به کړکېچ زیات کړي.
د واشنګټن – تهران الکترونیکي هوکړې له لاسلیک وروسته د دواړو هېوادونو ترمنځ لومړی پړاو مذاکرات وشول چې پکې د مذاکراتو پر دوام او سولهییز حل ټینګار وشو.
خو د څو ورځو په تېرېدو سره امریکا د ایران پر ځینو فابریکو هوایي بریدونه وکړل چې په ځواب کې یې ایران هم یو شمېر امریکایي پوځي ځایونه په نښه کړل.
د امریکا ولسمشر د ایران ځوابي بریدونو غوسه کړ او خبرداری ورکړی چې که ایران بیاځلي داسې اقدام وکړي، ښايي له امریکا سره نور د خبرو فرصت له لاسه ورکړي.
بلخوا ایراني چارواکو هم خبرداری ورکړی چې دوی به خپلو ځوابي بریدونو ته ادامه ورکوي او په نږدې ورځو کې ښايي په سیمه کې د امریکا پوځي اډې یو وار بیا په نښه شي.
