د ملګرو ملتونو د بشري مرستو د همغږۍ دفتر (اوچا) یوې مسوولې «اولګا چرفکو» د ښځینه ډاکترانو د کمښت له امله د افغان ښځو او نجونو، په ځانګړې توګه د میندو او نویو زیږېدلو ماشومانو پر روغتیايي وضعیت اندېښنه ښودلې ده.
مېرمن چرفکو بامیان ولایت ته له سفر وروسته ویلي چې اوسمهال په افغانستان کې د ښځینه ډاکترانو کمښت محسوسېږي او د ښځینه ډاکترانو موندل سخت شوي دي.
د اوچا دې مسوولې ویلي چې د یوې ښځینه ډاکترې د دندې په پرېښودو سره د هغې ځایناستی پیدا کول سخت شوي او دې وضعیت د افغان ښځو او نجونو د روغتیايي وضعیت په برخه کې اندېښنې زیاتې کړې دي.
اولګا چرفکو همداراز اندېښنه ښودلې چې په افغانستان کې د ښځینه ډاکترانو کمښت د ښځو او نجونو ژوند ژغورونکو روغتیايي خدمتونو ته لاسرسی محدود کړی او په ځانګړې توګه د میندو او نویو زیږېدلو ماشومانو روغتیایي وضعیت یې لاپسې خراب کړی دی.
د ملګرو ملتونو د بشري مرستو د همغږۍ دفتر یا اوچا تر دې مخکې هم په افغانستان کې د میندو او نویو زیږېدلو ماشومانو پر روغتیايي وضعیت اندېښنه ښودلې وه او په دې برخه کې یې د بېړنیو اقداماتو غوښتنه کړې وه.
