د نیمروز ځايي مسوولین وایي، د یاد ولایت په «کنګ» ولسوالۍ کې دوو کوچنیو نجونو په اوبو کې د ډوبېدو پرمهال ژوند بایللی دی.
د کنګ ولسوالۍ د مسوولینو په وینا چې دا پېښه پرون شوې او دا دوې ۱۵ کلن او ۱۱ کلنې خویندې په ویاله کې د ډوبېدو له امله مړې شوې دي.
مسوولینو ویلي چې دغو نجونو کور ته اوبه راوړلې چې په ویاله کې ور غورځېدلې او ژوند یې بایللی دی.
سرچینې لیکلي چې د دغو نجونو جسدونه خلکو را ایستلي او کورنۍ ته سپارلي دي.
له تېرو څو میاشتو راهیسې د هېواد په بېلابېلو ولایتونو کې ورته پېښې زیاتې شوې او نږدې هره ورځ ماشومان او لویان د دا ډول پېښو قرباني کېږي.
تر دې پېښې مخکې په ماهیپر کې دوه ځوانان د عکس اخیستلو پرمهال په اوبو کې له ډوبېدو وروسته مړه شوي وو.
بلخوا د اسلامي امارت چارواکو بار بار له هېوادوالو غوښتي چې د چکر یا لامبو پرمهال هغو سیمو ته له ورتګ ډډه وکړي چې ډنډې یا زیاتې اوبه ولري.
د یادولو ده چې اوسمهال د هېواد په یو شمېر بندونو کې پر لامبو هم کلک بندیز لګېدلی، خو له دې سره سره بیا هم ورته پېښې د هېوادوالو ژوند اخلي.
