پاکستاني چارواکي وايي، له افغانستان سره نږدې په خیبر پښتونخوا ایالت کې د امنیتي ځواکونو پر موټر د وسلهوالو په برید کې یو پولیس وژل شوی دی.
د سيمهييزو پوليسو وياند «فتحالله خان» ویلي، چې دا ډزې پرون شنبه د مرغومي په ۱۷مه د خيبر پښتونخوا ايالت په «دوغر عمرزي» ولسوالۍ کې شوې دي.
د هغه په وينا، تر اوسه څرګنده نه ده چې برید چا کړی، خو د بريدګرو د موندلو لپاره پلټنې روانې دي.
که څه هم تر اوسه کومې ډلې د دې بريد مسووليت نه دی منلی، خو په دې سيمه کې پر پوليسو د تېرو بريدونو مسووليت د پاکستاني طالبانو تحریک ډلې منلی و.
په همدې حال کې، د پاکستان پوځ د جنورۍ په پنځمه خبر ورکړ چې دوی په جنوبي وزیرستان کې په عملیاتو کې ۱۱ وسلهوال جنګیالي وژلي دي.
د پاکستان د پوځ په وینا، دوی په سیمه کې د دې جنګیالیو د شتون په اړه لا تر مخه معلومات ترلاسه کړي وو او په دې عملیاتو سره یې په راتلونکي کې د ترهګریزو کړنو مخه نیولې ده.
د راپورونو له مخې یوازې د تېر کال په ډسمبر میاشت کې د دې هېواد په ځینو برخو لکه جنوبي وزیرستان کې د پاکستاني طالبانو د بریدونو په پایله کې لږ تر لږه ۴۰ پاکستاني پوځیان وژل شوي او لسګونه نور ټپیان دي.
په داسې حال کې چې د پاکستان د طالبان تحریک خپل بریدونه زیات کړي، د دې هېواد چارواکو ادعا کړې چې د دې ډلې مشران په افغانستان کې شتون لري او د دې هېواد له خاورې خپل بریدونه تنظیموي.
