د فراه د امنيې قوماندانۍ وياند، محمد نسيم بدري ویلي، چې د دغه ولايت د پاسپورټ رياست يو کارکوونکى، احمد شعيب د مرغومي په ١٧مه، له غرمې وروسته د فراه د مرکز په باغنو سيمه کې وژل شوى دى.
د هغه په وينا، تر اوسه د دې وژنې انګيزه نه ده څرګنده، خو د دغه کارمند د وژنې په تړاو دوه شکمن کسان نيول شوي دي.
په همدې حال کې د پروان د جبل السراج ولسوال عبدالمعروف حق جو ویلي، چې تېره شپه د دې ولسوالۍ د منارې کلي اوسېدونکی د ناپېژاندو وسله والو له خوا وژل شوى دى.
ښاغلي حق جو دغه قومي مشر ‘مقصود’ نومولی او ویلي یې دي چې شاوخوا ٣٠ کاله عمر لري.
تر اوسه د دغه قومي مشر د وژنې انګېزه او لامل نه دی څرګند، خو د مسوولینو په وینا چې په دې اړه يې پلټنې پيل کړې دي.
په دې وروستیو کې په یو شمېر ولایتونو کې مرموز وژنې او نور جنايي جرمونه زیات شوي دي.
په وروستۍ پېښه کې د مرغومي په ۱۵مه د پکتیا ولایت په مرکز ګردیز ښار کې یو ځوان د ناپېژاندو کسانو له خوا ووژل شو.
