دغه وزارت نن چهارشنبه د مرغومي ۱۴مه د یوې خبرپاڼې په خپرولو سره ویلي چې دواړو لورو په افغانستان کې د سیاسي ګوندونو ترمنځ د خبرو او همداراز د نجونو پر کار او زدهکړو د بندیز په اړه خبرې کړې دي.
د اسلامي امارت چارواکو د ښځو او نجونو د حقونو په برخه کې د محدودیتونو له امله په دې وروستیو کې په پوهنتونونو کې د نجونو زدهکړه تر بل امر پورې ځنډولې او همداراز یې په کورنیو او بهرنیو غیردولتي ادارو کې د ښځو پر کار بندیز لګولی دی.
د افغانستان اوسني حکومت د خپلو پرېکړو د بدلولو په برخه کې کوم انعطاف نه دی ښوولی او دوی له دې مخکې ویلي وو چې نړیواله ټولنه باید د افغانستان په کورنیو چارو کې لاسوهنه ونه کړي.
په دې وروستیو کې په افغانستان کې د ملګرو ملتونو د مرستندوی دفتر (یوناما) مرستیال، مارکس پوتزل د اسلامي امارت د کورنیو چارو له وزیر، سراج الدین حقاني او د رییسالوزرا له مرستیال، عبدالسلام حنفي سره کتلي دي.
یوناما د دې غونډې په اړه د نورو معلوماتو له ورکولو پرته په یوه ټویټ کې لیکلي چې په خیریه موسسو کې د افغان ښځو له کارکولو منع کول او له پوهنتونونو او ښوونځیو څخه د هغوی بېبرخې کول په افغانستان کې میلیونونه خلک زیانمن کړي او د حیاتي مرستو د رسولو مخه یې نارینه، ښځو او ماشومانو ته رسولې ده.
د اسلامي امارت د رییسالوزرا مرستیال دفتر ویلي چې عبدالسلام حنفي له ښاغلي پوتزل سره په لیدنه کې ټینګار کړی چې راپورته شوي مسایل باید د متقابل تفاهم له لارې حل شي.
په همدې حال کې د ملګرو ملتونو د بشري چارو د همغږۍ دفتر هم ویلي، چې د بشري چارو د همغږۍ لپاره د ملګرو ملتونو د سرمنشي مرستیال، مارتین ګریفیتس به په راتلونکو اونیو کې افغانستان ته سفر وکړي او له اسلامي امارت سره به د نجونو د زدهکړو او کار په اړه خبرې وکړي.
