د بنګلهدېش مخکنۍ لومړۍ وزیرې، شیخ حسینې ویلي چې سږ کال به بېرته خپل هېواد ته لاړه شي. په داسې حال کې چې د بنګلهدېش حکومت د هغې د اعدام حکم صادر کړی دی.
شیخ حسینه په ۲۰۲۴ کال کې د محصلینو د پاڅون پرمهال له بنګلهدېش څخه وتښتېده. تازه یې له NDTV هندۍ شبکې سره په مرکه کې ویلي چې د هر ډول دسیسې او خنډ سره سره به سږ کال خپل هېواد ته لاړه شي.
دا لومړی ځل دی چې «شیخ حسینې» هېواد ته د بېرته تګ دقیقه نېټه اعلان کړې ده. په داسې حال کې چې د «ډاکا» یوې محکمې په تېره نوامبر میاشت کې «شیخ حسینه» د ۲۰۲۴ کال د ناامنیو پرمهال د قتل د فرمان صادرولو له امله پر اعدام محکومه کړې ده.
خو حسینې دا حکم «غیرقانوني او سیاسي انګېزه» بللې او د بنګلهدېش پر قضایه قوه یې د «سیاسي انتقام» تور پورې کړی و.
هغې ټینګار کړی چې دا له مرګه نه ویریږي او هېواد ته د بېرته تګ موخه یې شخصي ارمان نه دی، بلکې د ډیموکراسۍ بیارغونه، د قانون حاکمیت او د ۱۹۷۱ کال د ازادۍ روحیه ده.
حسینې، عوامي لیګ «د بنګال په خاوره کې ریښېغځوونکی او د بنګالي ملت هویت» بللی او د طارق رحمان په مشرۍ له حکومت یې غوښتي چې پر ګوند بندیز لرې کړي، جعلي قضیې لغوه او سیاسي بندیان ازاد کړي.
