د ترانسپورت او هوایي چلند وزارت د هواپېژندنې ادارې نن د هېواد په لسو ولایتونو کې د تالندې برېښنا، ورښت او سېلابونو اټکل کړی دی.
د هواپېژندنې د خبرپاڼې له مخې چې دا ورښت نن (شنبه) په نورستان، کونړ، لغمان، ننګرهار، کاپیسا، پروان، لوګر، پکتیا، خوست او پکتیکا ولایتونو کې اټکل شوی دی.
د اټکل له مخې چې د یادو ولایتونو په بېلابېلو سیمو کې به د ورښت کچه له ۱۰ تر ۳۵ مليمترو پورې وي.
د ترانسپورت او هوایي چلند وزارت د هواپېژندنې ادارې همداراز په شمالي، لوېدیځو، سوېلي، سوېلختیځو، مرکزي او ختیځو ولایتونو کې د تېزو بادونو، خاورو او دوړو د پېښېدو خبرداری هم ورکړی چې سرعت به یې په یو ساعت کې له ۵۰ تر ۹۰ کیلومترو پورې وي.
دا اټکل داسې مهال کېږي چې له تېرو څو ورځو راهیسې په ځینو ختیځو ولایتونو کې د ورښت او سېلابونو له امله خلکو ته ځاني او درانه مالي زیانونه اوښتي دي.
د ویلو ده چې د روان هجري شمسي کال له پیله تر اوسه په هېواد کې د ورښت، سېلابونو، ځمکې ښويېدو او زلزلې له امله سلګونه هېوادوال مړه او سلګونه نور ټپيان شوي دي.
د سږنیو سېلابونو له امله سلګونه جریبه کرنیزې ځمکې او باغونه هم ویجاړ شوي دي.
