د ټولګټو وزارت وایي چې د دغه ولایت مرکز، میمنې ښار څخه تر «فردوس» ولسوالۍ کې د ۲۵ کیلومتره سړک رغنیزې چارې جریان لري.
د یاد وزارت ویاند، محمد اشرف حقشناس په اېکسپاڼه لیکلي چې په دې پروژه کې د ۸۳ پلګوټو او ۱۴۹۳ مترو استنادي دیوالونو جوړول هم پکې شامل دي او د رغونې چارې یې د ۲۱ سلنه فزیکي پرمختګ سره جریان لري.
ښاغلي حقشناس لیکلي چې دا پروژه د ټولګټو وزارت له لوري د سیمې د ترانسپورټي زیربناوو د پراختیا په موخه پلې کېږي او د ۲۴ میاشتو په موده کې به بشپړه او ګټې اخیستنې ته وسپارل شي.
“د دې پروژې په بشپړېدو سره به د میمنې ښار او د فردوس، بلچراغ، ګرزیوان، بندر او لولاش ولسوالیو ترمنځ د هېوادوالو د تګ راتګ لپاره ګڼې اسانتیاوې رامنځته شي، د سفر وخت او لګښتونه به راکم شي، د سوداګریزو او اقتصادي فعالیتونو د پراختیا زمینه به برابره شي او د سیمې اوسېدونکو ته به معیاري ترانسپورتي خدمات وړاندې شي.”
د یادولو ده چې اوسمهال د هېواد په ډېرو سیمو کې د لویو او فرعي سړکونو د جوړولو چارې روانې دي.
