دغه وزارت نن دوشنبه د سلواغې ۱۷مه ویلي چې د سالنګ پر لاره دا مهال مسافر وړونکي او بار وړونکي موټر پر ټایرونو له ځنځیر تړلو سره دواړو لورو ته تګ راتګ کولای شي.
خو په اعلامیه کې د بامیان د یو شمېر لارو په اړه ویل شوي چې هلته د حاجیګک کوتل، د ورس پل – قناق کوتل، دشت دیوالي – پنجاب بازار، د ابقل کرمان او بند امیر سړکونه د لنډ مهال لپاره تړلي او دا مهال یې د پاکولو چارې دوام لري.
دغه وزارت همداراز ویلي چې د غور – هرات لاره پرانیستې او هلته د یو شمېر نورو سړکونو په پاکولو کار روان دی.
د ټولګټو وزارت زیاته کړې چې یادو لارو سربېره د هېواد نورې ټولې لارې د اوسمهال لپاره د ترافیکو پر مخ پرانیستې دي.
په تېرو څو اونیو کې د هېواد شاوخوا ۲۰ ولایتونه د درنو واورو او توفانونو شاهدان وو چې له امله یې د سالنګ په ګډون یو شمېر لارې څو ځلې وتړل شوې.
