دا مرګونې زلزله نن دوشنبه د سلواغې ۱۷مه د سهار شاوخوا ۴ بجې د ترکیې په سویل ختیځ کې وشوه چې له امله یې لسګونه ودانۍ ونړېدلې.
د ترکیې د ولسمشر مرستیال، فواد اوکتای ویلي چې ٢٨٤ تنه مړه شوي او ٢٣٢٠ نور ټپیان دي، خو په وینا یې چې ښايي د قربانیانو شمېر نور هم زیات شي.
د راپورونو له مخې، د زلزلې ټکانونه په سوریه کې هم محسوس شوي چې له امله یې تر دې دمه ۴۲ کسانو مړینه تایید شوې ده.
نړیوالو رسنیو د دې زلزلې شدت ۷،۸ ښوولی او مرکز یې د ترکیې او سوریې ترمنځ ۲۶ کیلو متره تر ځمکې لاندې پېژندل شوی دی.
ویل کېږي، د زلزلې ټکانونه دومره شدید وو چې له امله یې یوازې د ترکیې په خاوره کې ۷ ودانۍ نړېدلې او همداراز په سوریه کې هم د ځینو کورونو د نړېدلو راپورونه ورکړل شوي دي.
