د ملګرو ملتونو د بشري چارو د همغږۍ دفتر (اوچا) د افغانستان د بشري مرستو صندوق ته د اروپايي ټولنې له خوا د ۱۰ میلیون یورو مرستې اعلان وکړ.
اوچا نن (پنجشنبه، د اګست ۱۲مه) په ټویټر کې په یوه پیغام کې د اروپايي ټولنې څخه د دغې مرستې مننه وکړه. او ویلي یې دي، چې دا ملاتړ به په ټول افغانستان کې د مخ په زیاتېدونکو اړتیاوو سره مخ میلیونونو خلکو ته د ژوند ژغورونکي بشري مرستو دوام کې مرسته وکړي.
دغه سازمان زیاته کړه: “په ګډه، موږ په انسانیت کې پانګونه کوو. “
اوچا په دې وروستیو کې اعلان وکړ چې سږکال د افغانستان د بشري اړتیاوو او غبرګون پلان بودیجې یوازې ۲۶ سلنه تمویل شوې ده.
باید وویل شي چې اوچا سږکال د افغانستان د خلکو اړتیاوو ته د رسېدو لپاره ۱.۷ میلیارد ډالر غوښتنه کړې او په هېواد کې ۲۱.۹ میلیون خلک بشري مرستو ته اړتیا لري.
