د افغانستان د سوداګرۍ او پانګونې خونې عمومي رئس سید کریم هاشمي هند هېواد ته د خپل رسمي سفر په ترڅ کې د «پيايچډي د سوداګرۍ او صنایعو خونې (PHD Chamber of Commerce and Industry) له رهبرۍ او غړو سره کتنه او خبرې وکړې.
په دغې ناستې کې د «افغانستان او هندوستان ترمنځ د سوداګریزو فرصتونو» تر عنوان لاندې د هند په نوي ډهلي ښار کې د پيایچډي د سوداګرۍ او صنایعو خونې په مرکزي دفتر کې ترسره شوه. په دې ناسته کې په هند کې د افغانستان ا.ا سفیر ښاغلي مفتی نور احمد نور، د بلخ د سوداګرۍ او پانګونې خونې مرستیال ښاغلي هارون قاضي، د افغانستان د سوداګرۍ او پانګونې خونې د مدیره پلاوي غړی ګلمیر امینی، په هندوستان کې د افغانستان د سوداگریزې اتشې سید حماد هاشمي او یو شمېر افغان او هندي سوداګرو او پانګوالو ګډون درلود.
همداراز په دې غونډه کې د افغانستان او هندوستان ترمنځ د سوداګریزو اړیکو د پراختیا، د ګډو پانګونو د زیاتوالي او د شته فرصتونو څخه د اغېزناکې ګټې اخیستنې په اړه هر اړخیز بحث او د نظرونو تبادله وشوه.
ښاغلي هاشمي په خپلو خبرو کې ټینګار وکړ چې سوداگري یوازې د توکو د اخیستلو او پلورلو معنی نه لري، بلکې د کارموندنې، اقتصادي ودې، د خلکو د سوکالۍ او د ملتونو د نږدېوالي وسیله ده.
هاشمي وویل چې د افغانستان او هندوستان ترمنځ سوداګریزې اړیکې باید یوازې د صادراتو او وارداتو په کچه محدودې نه وي، بلکې باید د ګډو پانګونو، ګډو شرکتونو، ټکنالوجۍ لېږد، د بشري ځواک روزنې او صنعتي همکاریو پر لور پراخې شي.
وروسته د PHD د سوداګرۍ او صنایعو خونې ریس سنتوش جوشي د افغان پلاوي هرکلی وکړ او د دواړو هېوادونو ترمنځ د سوداګریزو اړیکو پر پیاوړتیا یې ټینګار وکړ.
هغه وویل چې دغه خونه د افغانستان سره په بېلابېلو برخو کې لکه درمل جوړونه، لوجستیک، کارګو، صنعتي تولیداتو او پانګونې کې همکارۍ ته چمتو ده او همدارنګه ژمنه وکړه چې په نږدې راتلونکي کې به د هندي سوداګرو او پانګوالو یو ۲۰ کسیز پلاوی افغانستان ته سفر وکړي او له نږدې به د پانګونې فرصتونه وڅېړي.
