بربنیاد اعلام نتایج ابتدایی انتخابات ریاست جمهوری تاجیکستان، امام‌علی رحمان بر طبق سنت گذشته، این بار نیز رییس جمهور این کشور شد.

آقای رحمان برای پنجمین بار است که در ۲۶ سال گذشته به ریاست جمهوری تاجیکستان می‌رسد و مخالفان وی، او را متهم به انحصار قدرت در این کشور می‌کند.

کمیسیون مرکزی انتخابات و همه‌پرسی تاجیکستان امروز (دوشنبه، بیست و یکم میزان) نتایج ابتدایی انتخابات ریاست جمهوری این کشور را اعلام کرد.

براساس اعلام این کمیسیون، امام‌علی رحمان برنده انتخابات ریاست جمهوری روز گذشته تاجیکستان شده است که بیش از ۹۰ درصد آرای رای‌دهندگان را به خود اختصاص داده‌اند.

بربنیاد آمارها در این انتخابات ۴ میلیون و ۲۲۱ هزار و ۷۶ نفر شرکت کرده بودند. در رقابت‌های انتخابات ریاست جمهوری تاجیکستان به شمول امام علی رحمان، رییس جمهور فعلی، چهار تن دیگر نیز حضور داشت.