مقام‌های محلی در ولایت بامیان از برگزاری چهار جشنوارۀ بزرگ فرهنگی و هنری در فصل‌های تابستان و خزان در بخش‌های مختلف این ولایت خبر می‌دهند.

محمد طاهر زهیر، والی بامیان می‌گوید که جشنواره‌های دمبوره، گل کچالو، راه ابریشم و سمپوزیم فولکلور هزاره‌گی از جمله برنامه‌های فرهنگی و هنری اند که در آینده‌های نزدیک در این ولایت برگزار خواهند شد.

آقای زهیر هدف از برگزاری‌های جشنواره‌های ذیل را  رشد صنعت توریزم و بلند بردن سطح اقتصاد مردم محل گفته و افزوده که این جشنواره‌ها شامل برنامه‌های متنوع فرهنگی، توریستی و هنری می‌باشند.

آقای زهیر هم‌چنان می‌گوید که برنامه‌های فرهنگی ما را کمک می‌کند که در طول سال، گردش‌گران بیش‌تر از این ولایت دیدن کنند و چرخۀ اقتصاد مردم محل به حرکت بی‌افتد.

والی بامیان می‌گوید، در جشنواره‌های متذکره قرارست  بازی‌های محلی، اجرای موسیقی محلی، نمایش‌گاه صنایع‌دستی، شعر خوانی، قصه‌گویی، اجرای تیاتر و دیگر برنامه‌های جالب فرهنگی گنجانیده‌ شوند.

از سوی‌هم، والی بامیان می‌افزاید که در روزهای‌های جشنواره آماده‌گی‌های لازم روی دست گرفته شده‌است.

به اساس اطلاعات به دست آمده، قرار است در تاریخ‌های ۸ و ۹ سرطان جشنواره دمبوره بامیان در مرکز این ولایت برگزار گردد، که در آن هنرمندان ولایت‌های مختلف افغانستان، موسیقی محلی دمبوره را اجرا خواهند کرد.