د ا.ا اطلاعاتو او کلتور وزارت وایي چې په هلمند ولایت کې د بُست کلا د طاق او څاه تاریخي ودانیو رغنیزې چارې ۴۵ سلنه بشپړې شوې دي.
د خبرپاڼې له مخې چې د اطلاعاتو او کلتور وزارت د فرهنګ او هنر مرستیال، عبدالرحمن طیبي له یادې پروژې څخه لیدنه کړې ده.
سرچینې لیکلي چې ښاغلي طیبي د دې لیدنې پرمهال د رغنیزو چارو د مسلکي بشپړولو او د دغو ودانیو د تاریخي اصلیت پر ساتلو ټینګار کړی دی.
د اسلامي امارت اطلاعاتو او کلتور وزارت لیکلي چې عبدالرحمن طیبي همداراز د هېواد د تاریخي او فرهنګي میراثونو ساتنه او د لرغونو سیمو، ودانیو او آثارو د نړېدو، قاچاق او غصب مخنیوی د اسلامي امارت له مهمو مسوولیتونو څخه بللي دي.
د یادولو ده چې د اسلامي امارت د اطلاعاتو او فرهنګ وزارت د دغو دوو تاریخي ودانیو د بیارغولو لپاره نږدې ۱۵ میلیونه افغانۍ لګښت کوي، او چارې به یې دوو کلونو کې بشپړې شي.
د اطلاعاتو او کلتور وزارت همداراز ویلي چې بلخوا په کندهار ولایت کې د ملالې میوندۍ د مقبرې رغولو تخنیکي سروې هم شوې ده.


