د ا.ا کورنیو چارو وزارت د نشهيي توکو پر وړاندې د مبارزې معینیت وایي چې په کابل ښار کې ۱۴۸ کسان د نشهيي توکو خرڅلاو، استعمال او قاچاق په تړاو نیول شوي دي.
د دې ادارې په اېکسپاڼه لیکل شوي چې دا کسان له تېرې یوې اوونۍ راهیسې د کابل ښار په بېلابېلو سیمو کې د جلا عملیاتو پرمهال نیول شوي دي.
د خبرپاڼې له مخې چې نیول شوي کسان به تر لومړنیو څېړنو وروسته عدلي او قضایي ارګانونو ته ور وپېژندل شي.
د نشهيي توکو پر وړاندې د مبارزې معینیت لیکلي چې له نیولشویو کسانو څخه ۱.۷۴۹ کیلوګرامه چرس، ۱.۲ کیلوګرامه شیشه، ۴ لیتره الکولي مشروبات، ۵ بوتله طبي الکول، څه اندازه هیروئین، ۷۲۰ ګرامه تریاک او ۶۳۵۴ عدده د نشې ګولۍ ترلاسه شوې دي.
د یادولو ده چې له تېرې څه مودې راهیسې د نشهيي توکو د کاروبار په تړاو د خلکو نیول کېدل زیات شوي دي.
د اسلامي امارت له بیاځلي واکمنېدو وروسته په ټول هېواد کې د نشهيي توکو پر کښت، قاچاق، استعمال او هر ډول کاروبار کلک بندیز لګېدلی او له تېرو پنځو کلونو راهیسې د نشهيي توکو لسګونه کارخونې هم ویجاړې شوې دي.


