د پاکستان بهرنیو چارو وزیر، اسحاق ډار وايي چې د مکې تړون یوه کمېټه په ریاض کې د یمن حوثیانو پر وړاندې د پوځي اقدام پرځای د سیاسي تعامل په اړه غونډه کوي.
ډار ویلي چې دا وړاندیز د ایران کړی، او غوښتل شوي چې له حوثیانو سره دې سیاسي تعامل وشي.
ایران ویلي چې د یمن حوثیان او عراقي ملېشو له دوی سره کوم تړاو نه لري، خو د دې موضوع د سیاسي حل غوښتنه کوي.
د پاکستان بهرنیو چارو وزیر، اسحاق ډار همداراز ویلي چې په دې اړه د ایران وړاندیز لا هم رسمي نه دی، ښايي په دې اړه راتلونکې اوونۍ د مکې تړون کمېټه یوه ناسته ولري.
ایران په غیرمستقیم ډول دا غوښتنه وروسته له هغې کوي چې له تېرو څو اوونیو راهیسې د یمن حوثیانو او سعودي عربستان ترمنځ جګړې زور اخیستی او د دواړو لوریو ترمنځ ترینګلتیاوې زیاتې شوې دي.
په ورته مهال د سعودي عربستان په مشرۍ ایتلاف ویلي چې د حوثیانو له لوري د سعودي په سوېل کې د خمیس مشیط ښار پر لور توغول شوي درې بالستیک توغندي یې شنډ کړي دي.
بلخوا په راپورونو کې د حوثیانو په حواله ویل شوي چې سعودي عربستان په تېرو ۲۴ ساعتونو کې پر یمن ۹۴ بریدونه کړي دي.
