په کابل کې یو شمېر علماوو ګډه اعلامیه خپره کړې او پر افغان خاوره یې د پاکستان پوځي رژیم بریدونه په کلکه غندلي دي.
د دغو علماوو په اعلامیه کې راغلي چې پر افغانستان د پاکستان پوځي رژیم هوایي بریدونه له اسلامي او بشري ارزښتونو سره په ټکر کې دي، او د سیمې امنیت او ثبات ته زیان رسوي.
په کابل کې دغو علماوو له اسلامي هېوادونو او نړیوالې ټولنې غوښتنه کړې چې د افغانستان پر وړاندې د ترسره کېدونکو پوځي او امنیتي اقداماتو په اړه خپل مسوولیت ادا او د ملکي وګړو د خوندیتوب لپاره لازم اقدامات ترسره کړي.
دا په داسې حال کې ده چې تېره شپه د پاکستان پوځي رژیم د کونړ په «شلطن» ولسوالۍ او د هلمند په ګرمسېر ولسوالۍ کې د ملکي خلکو پر کورونو هوایي بریدونه کړي چې له امله یې د ښځو او ماشومانو په ګډون ۲۱ کسانو ته مرګژوبله اوښتې ده.
د اسلامي امارت ویاند، ذبیح الله مجاهد په اېکسپاڼه لیکلي چې د پاکستان پوځي رژیم د کونړ شلطن ولسوالۍ په «چوګام» سیمه او د هلمند ګرمسېر ولسوالۍ په «صفار» سیمه کې د ملکي وګړو کورونه په نښه کړي دي.
د مجاهد په وینا چې د دغو بریدونو له امله د ښځو او ماشومانو په ګډون ۹ هېوادوال شهیدان او ۱۱ نور ټپیان شوي دي.
د اسلامي امارت ویاند د پاکستان پوځي رژيم دا بریدونه په کلکه غندلي او دا یې پر افغان خاوره ښکاره «تېری» بللی دی.


