د ننګرهار مسوولین وایي، د یاد ولایت په خوږیانو ولسوالۍ کې د هاوان زړې مرمۍ چاودنې له امله درې ماشومان وژل شوي او یو بل ټپي شوی دی.
د دغه ولایت امنیې قوماندانۍ ویاند، سید طیب حماد رسنیو ته ویلي چې دا پېښه د خوږیاڼو ولسوالۍ په «زاوې» سیمه کې شوې ده.
د خبرپاڼې له مخې چې دا پېښه په دې زړې مرمۍ د ماشومانو د لوبو پرمهال رامنځته شوې ده، او څلورو ماشومانو ته پکې مرګژوبله اوښتې ده.
د مسوولینو په وینا چې له چاودنې وروسته ټپيشوی ماشوم د امنیتي ځواکونو له لوري روغتون ته لېږدول شوی دی.
تر دې مخکې هم د هېواد په بېلابېلو ولایتونو کې ورته چاودنې شوې چې له امله یې د ډېرو ماشومانو په ګډون لسګونه کسان وژل شوي او لسګونه نور ټپیان دي.
د یادولو ده چې لا هم د هېواد په لرې پرتو سیمو کې له پخوانیو جګړو پاتېشوي ناچاوده توکي شته چې وخت ناوخت د هېوادوالو د مرګژوبلې لامل کېږي.
څو ورځې مخکې په وردګو ولایت کې د ورته پېښې له امله دوه ماشومان وژل شوي وو او یو بل ټپي و.
بلخوا د ماینپاکۍ د ځینو موسسو له لوري په هېواد کې د ماینونو ایستلو او خنثا کولو چارې هم روانې دي، خو لا هم د هېواد ټولې سیمې له دغو توکو نه دي پاکې شوې.


