د ا.ا عدلیې وزارت خبر ورکړی چې په بلخ ولایت کې د «خاتم الأنبیا پروژې» په نوم ۶۰۰ جریبه ځمکه د اختصاصي محکمې د شرعي حکم پر اساس امارتي تثبیت شوې ده.
د دغه وزارت په وېبپاڼه لیکل شوی چې دا ځمکه د شمال زون امارتي غصب شویو ځمکو قضیو ته د رسېدنې ځانګړې محکمې د پرېکړې له مخې، د اسنادو او مدارکو له بررسۍ وروسته امارتي تثبیت شوې ده.
د خبرپاڼې له مخې چې دا ځمکه د بلخ ولایت د مرکز، مزارشریف ښار د دولسمې ناحیې په قلعه قل محمد سیمه کې موقعیت لري او د ځمکو له غصب څخه د مخنیوي او د غصب شویو ځمکو د استرداد کمېسیون یې موضوع مخکې بررسي کړې وه.
د سرچینې په وینا: “د ځمکو له غصب څخه د مخنیوي او د غصب شویو ځمکو د استرداد قانون د ۱۷ مادې له مخې د یادې شوې ځمکې دوسیه په رسمي توګه د شمال زون د امارتي غصب شویو ځمکو قضیو ته د رسېدنې اختصاصي محکمې ته سپارلې وه.”
عدلیې وزارت لیکلي چې متصرفین مکلف دي چې یاده ځمکه د ځمکو له غصب څخه د مخنیوي او د غصب شویو ځمکو د استرداد کمېسیون ته وسپاري.
