بهرنیو رسنیو راپور ورکړی چې په اندونیزیا کې د پرونۍ مسافروړونکې کښتۍ د چپهکېدو له امله د ۶ کسانو مړینه تایید شوې او ۱۲۹ نور لا هم نادرکه دي.
د الجزیرې خبري شبکې د راپور له مخې چې له دې پېښې وروسته ژغورونکو ډلو ۱۰۸ کسان ژغورلي دي.
پرون کامپس خبري شبکې راپور ورکړی و چې د «ویرګو ټرانسپورټ ۸» کښتۍ د ختیځ جاوا له سورابایا څخه د سویلي کالیمانتان په لور روانه وه چې د اندونیزیا په وخت شاوخوا ۲ بجې ورسره اړیکه پرې شوې وه.
هغه مهال د بانجارماسین د لټون او ژغورنې دفتر مشر «پوتو سودایانا» ویلي وو چې د هغه دفتر دوه ساعته وروسته د بیړني حالت راپور ترلاسه کړی او سمدلاسه د لټون او ژغورنې ډله سیمې ته استول شوې وه.
د هغوی په وینا یې دا کښتۍ د خرابې هوا او سختو څپو له امله چپه شوې وه.
د راپورونو له مخې چې دا مهال ژغورونکې ډلې د کښتۍ د موقعیت یا احتمالي ژوندي پاتې شویو کسانو د موندلو لپاره لټون پیل کړی دی.


