د ا.ا معیار او کیفیت ادارې خبر ورکړی چې په حیرتان بندر کې د کمکیفیته توکو څلور محمولې بېرته صادروونکي هېواد ته ورګرځول شوې دي.
د دې ادارې په اېکسپاڼه لیکل شوي چې دا توکي د حیرتان بندر د معیار او کیفیت امریت د اړینو لابراتواري ازموینې له ترسره کولو وروسته کمکیفیته تشخیص شوې دي.
د خبرپاڼې له مخې چې په دغو محمولو کې د ۱۷۳۰ کیلوګرامه په وزنونو د LED ګروپونو دوه محمولې، د ۳.۵ ټنو په وزن د مسي سیمونو یوه محموله، ۲۰۰ کیلوګرامه سولري چراغونه او د ۲۲ ټنو په وزن د سمنټو یوه محموله، شامل دي.
د معیار او کیفیت ادارې لیکلي: “یاد توکي له دقیقو ارزونو او ازموینو وروسته د هېواد له داخلي معیارونو سره مغایر تشخیص شول او د سمیهییزو اړوندو ادارو د استازو په شتون کې هېواد ته د هغوی د داخلېدو مخه ونیول شوه او بېرته صادرونکي هېواد ته وګرځول شول.”
د معیار او کیفیت ادارې د هېواد په بندرونو کې د کیفیت د تثبیت او کنټرول پروسې پر پياوړتیا ټینګار کړی او ویلي یې دي چې د غیرمعیاري توکو او محصولاتو د واردېدو مخنیوی به کېږي.
د یادولو ده چې یادې ادارې تر دې مخکې هم د هېواد په بندرونو کې بېلابېل کمکیفیته توکي مسترد کړي وو.


