د ملګرو ملتونو د سرمنشي ویاند «سټیفن دوجاریک» په افغانستان کې د دغه سازمان د ښځینه کارکوونکو پر وضعیت اندېښنه ښودلې او دا ډول محدودیتونه یې له نړیوالې ټولنې سره د افغانستان د بیا یوځای کېدو پر وړاندې اصلي خنډ بللی دی.
نوموړي ویلي چې د افغان نجونو او ښځو پر زدهکړې او کار بندیزونه د دوی پر ژوند منفي اغېز کړی دی.
سټیفن دوجاریک همداراز ویلي چې له یو کال راهیسې افغان میرمنې په ټول هېواد کې د ملګرو ملتونو دفترونو ته له لاسرسي منع شوې دي، او دا ډول بندیزونه یې د ملګرو ملتونو د منشور په ګډون له نړیوالو قوانینو سره په ټکر کې بللي دي.
په اعلامیه کې راغلي چې کارځایونو ته د ملګرو ملتونو د ټولو کارکوونکو لاسرسی د دغه سازمان د ماموریت د ترسره کولو، په ځانګړې توګه ښځو او نجونو ته د مرستې رسولو او ملاتړ لپاره خورا مهم دی.
د ملګرو ملتونو د سرمنشي ویاند د اسلامي امارت له چارواکو غوښتي چې د دوی پر افغان ښځینه کارکوونکو بندیز په سملاسي توګه لغوه او په ټول هېواد کې د ملګرو ملتونو ودانیو ته د دوی خوندي او بې خنډه لاسرسی یقیني کړي.
