د راپورونو له مخې، په بلوچستان ایالت کې د ماین په چاودنه کې درې وروڼه وژل شوي او د دوی یو خپلوان ټپي دی.
د پاکستان ورځپاڼې ډن راپور ورکړی چې دا پېښه تېره ورځ(یکشنبه، د اګسټ ۳۰مه) د بلوچستان په ډوکي ولسوالۍ کې رامنځته شوه.
د ډوکي د پولیسو یو لوړ پوړی افسر منصور احمد ویلي، چې د چاودېدونکو توکو چاودنه هغه وخت وشوه کله چې یو پکاپ ټرک موټر د بختیر خان سیمې ته نږدې د موسمي اوبو له لارې څخه تېر شو.
د هغه په وینا، درې وروڼه، د یو خپلوان سره یوځای، خپلې کرنیزې ځمکې ته روان وو چې چاودنې دوی په نښه کړل؛ درې وروڼه په ځای کې مړه شول، څلورم کس ټپي شو. د دوی موټر هم په چاودنه کې ویجاړ شو.
پولیسو همداراز وویل چې چاودېدونکي توکي د نامعلومو کسانو لخوا ځای پر ځای شوي وو او له لرې کنټرول شوي وو.
پولیسو وویل چې د پېښې په اړه تحقیقات پیل شوي، خو تر اوسه هېڅ کس یا ډلې مسوولیت په غاړه نه دی اخیستی.
