د هرات والي شیخ مولانا اسلامجار د دې ولایت د صنعت او کانونو د خونې د اداري ودانۍ د پرانستلو په مراسمو کې وویل چې په هرات کې د ټاپي ګازو نللیکه پروژه به په دوو میاشتو کې بشپړه شي.
هغه زیاته کړه چې د ترکمنستان چارواکو د دې پروژې کار بشپړ کړی او له بشپړیېدو وروسته به یې د هرات چارواکو ته وسپاري.
د هرات والي د دې ولایت د صنعتي ښار له خلکو او فابریکو مالکینو څخه وغوښتل چې د ګازو نللیکې د پروسې د پیل لپاره اوس اړین چمتووالی ونیسي.
د ټاپي پروژه په سیمه کې یو له مهمو اقتصادي او انرژۍ پروژو څخه ګڼل کیږي چې کولی شي د افغانستان د اقتصادي وضعیت په ښه کولو کې کلیدي رول ولوبوي.
د دې نللیکې ټول اوږدوالی شاوخوا ۱۸۱۴ کیلومتره دی او په کلني ډول د ۳۳ ملیارد متر مکعب طبیعي ګازو د لیېږدولو ظرفیت لري، چې له دې څخه شاوخوا ۸۱۶ کیلومتره د افغانستان له خاورې تېرېږي.
دا نللیکه د هرات، فراه، نیمروز، هلمند او کندهار ولایتونو څخه تېریږي او د دې پروژې ټول لګښت ۲۲ میلیارده پنځه سوه میلیون ډالر دی.
د ترکمنستان څخه افغانستان، پاکستان او هند ته د طبیعي ګازو د لیږدولو سره، دا پروژه به نه یوازې د سیمې د هېوادونو د انرژۍ اړتیاوې پوره کړي، بلکې افغانستان به د انرژۍ په سکتور کې په یوه مهمه ټرانزیټ لاره بدل کړي.
د ټاپي پروژې په کارولو سره، افغانستان به نه یوازې له دې پروژې څخه کافي ګاز ترلاسه کړي، بلکې په کال کې به د ګازو د لیږد حق له څلور سوه میلیون ډالرو څخه ډېر عاید هم ترلاسه کړي.
