د کور او ښار جوړولو وزارت وایي چې د ا.ا مشرتابه له لوري په پنځو ولایتونو کې ۲۳ زره ۶۳۶ جریبه ځمکه د راستنېدونکو لپاره د ښارګوټو جوړولو په موخه یاد وزارت ته انتقال شوې ده.
د دغه وزارت د خبرپاڼې له مخې چې دا ځمکه د راستنېدونکو کډوالو د ښه، دایمي او باعزته ژوند د پیلولو په موخه د کور او ښار جوړولو وزارت ته انتقال شوې، ترڅو د منظمو پلانونو له مخې ډیزاین او پر راستنو شویو مهاجرینو ووېشل شي.
سرچینې لیکلي چې مسوولینو د یادو ښارګوټو د منظمې طرحې، تخنیکي ارزونې او د اړینو ښاري خدمتونو د برابرولو په برخه کې د وزارت پر مسلکي ظرفیتونو او تخنیکي ټیمونو ټینګار کړی دی.
“د حکمونو له مخې، په هلمند کې لس زره جریبه، نیمروز کې اته زره جریبه، غور کې ۷۰۶،۳۹ جریبه، ننګرهار کې ۱۰۰۶ جریبه او په فراه ولایت کې ۳۴۳۰ جریبه امارتي ځمکه یاد وزارت ته سپارل شوې ده.”
د کور او ښار جوړولو وزارت همداراز ویلي چې دوی به د خپلو مسلکي او تخنیکي ټیمونو له لارې د یادو ساحو سروې، تخنیکي ارزونه او ښاري پلانونه ترتیب کړي او د مهاجرینو لپاره به د استوګنې، سړکونو، عامه تأسیساتو، شنو ساحو او اړینو ښاري خدمتونو په پام کې نیولو سره معیاري ښارګوټي طرحه او ډیزاین کړي.
