د ا.ا ریاستالوزراء اقتصادي معاونیت وایي چې په میدانوردګ، بدخشان او کندوز ولایتونو کې د دریو عمومي روغتونونو جوړولو پروژې منظورې شوې دي.
دې ادارې لیکلي چې دا روغتونونه د وردګو ولایت په چک، بدخشان ولایت په شغنان او د کندوز ولایت په قلعهذال ولسوالۍ کې د ۲۰۸ میلیون افغانیو په لګښت جوړېږي.
د ریاستالوزراء اقتصادي معاونیت د معلوماتو له مخې چې د CHC روغتونونه د اسلامي امارت له لوري جوړېږي.
دا په داسې حال کې ده چې څو ورځې مخکې د اسلامي امارت ریاستالوزراء اقتصادي مرستیال، عبدالغني برادر د وردګ ولایت چک ولسوالۍ ته سفر کړی و او د دغه ولایت له اوسېدونکو سره یې لیدلي وو.
ښاغلي برادر د چک ولسوالۍ اوسېدونکو ته ډاډ ورکړی و چې هلته به نابشپړې پروژې په ښه ډول بشپړېږي او همداراز به په یاده ولسوالۍ کې یو عمومي روغتون جوړ شي.
په ورته مهال د چک ولسوالۍ یو شمېر اوسېدونکي خوښ دي چې په سیمه کې یې دا ډول عمومي روغتون جوړېږي.
د یادولو ده چې ملا عبدالغني برادر په میدانوردګ سربېره یو شمېر نورو ولایتونو ته هم سفرونه کړي او هېوادوالو ته یې د بېلابېلو پروژو د پلې کېدو ژمنې ورکړې دي.
