نړیوالو رسنیو راپور ورکړی، چې د روسیې په ختیځ کې د امور ګاز کیمیاوي کمپلیکس کې د اور لګېدو له امله د شپږ چینایي اتباعو په ګډون اووه کسان مړه شوي دي.
دغه کمپلیکس نن(چهارشنبه، د اګسټ ۲۶مه) وویل چې نهه نور چینایي کارګران هم ورک دي. د ټیلیګرام په یوه بیان کې ویل شوي چې اور د سېشنبې په ورځ ولګېد او د چهارشنبې تر ورځې پورې کنټرول شو.
په ټولیزه توګه ۱۵۲ کسان د ټپیانو درملنه وشوه، چې ۳۶ یې روغتون ته یوړل شول. د بیړني خدماتو یوه الوتکه سیمې ته رسېدلې ترڅو ټپیان د روسیې نورو روغتونونو ته ولیږدوي.
د امور ګاز کیمیاوي کمپلیکس، چې ځان د نړۍ د پولیتیلین او پولی پروپیلین یو له لویو تولیدونکو څخه بولي، د روسیې د سیبور او د چین د سینوپیک ترمنځ ګډه پروژه ده.
دغه کمپلیکس لا تر اوسه فعال نه دی او د تولید پیل کولو لپاره چمتو دی. د هغې اټکل شوی ظرفیت په کال کې ۲.۳ میلیون ټنه پولی پروپیلین او ۴۰۰ زره ټنه پولی پروپیلین دی.
روسیه ډېری وختونه د لویو صنعتي او زیربنایي پروژو د جوړولو لپاره د چینایي کارګرانو په ګډون بهرني کارګران کاروي. د روسیې د تحقیقاتو کمیټې وویل چې دوی د صنعتي خوندیتوب مقرراتو څخه د احتمالي سرغړونې په توګه د پیښې پلټنه کوي او د اور لګیدو دقیق لامل ټاکي.
باید وویل شي چې چین په دې اړه تبصره نه ده کړې.
