د ریاستالوزراء اقتصادي معاونیت وایي چې د کابل – بګرام سړک د لومړي فاز جوړېدو چارې ۳۱ سلنه بشپړې شوې دي.
د خبرپاڼې له مخې چې دا سړک ۶٫۲ کیلومتره اوږدوالی او ۵۰ متره سور لري، او د جوړېدو چارې به یې راتلونکي ۱۴۰۶ کال کې بشپړې شي.
اقتصادي معاونیت لیکلي چې په دې سړک ۴۵۵٫۸ میلیون افغانۍ مصرف راځي، او شنه ساحه، ګلدانونه، ویالې او پلې لارې د دې پروژې برخې دي.
د ریاستالوزراء اقتصادي معاونیت همداراز لیکلي چې دا سړک د نوي کابل پروژې د زیربناوو په برخه کې له مهمو او اساسي پروژو څخه ګڼل کېږي.
د یادولو ده چې د اسلامي امارت له بیاځلي واکمنېدو وروسته د هېواد د یو شمېر لویو لارو د جوړولو او رغولو چارې هم پیل شوې چې د ډېرو کارونه یې بشپړېدو ته نږدې شوې دي.
بلخوا په کابل ښار کې ډېر سړکونه پراخه شوي هم دي او همداراز د هېواد په ډېرو ښارونو کې د دویم لین سړکونو جوړېدو چارې هم روانې دي.
د سړکونو د جوړولو او پراختیا دا ډول پروژې وخت ناوخت د هېوادوالو له هرکلي سره مخ شوې او د ورته پروژو د تطبیق غوښتنه کېږي.


