د ا.ا ویاند ذبیحالله مجاهد د پاکستاني او تاجک وزیرانو هغه ادعاوې رد کړې چې په افغانستان کې د وسلهوالو ډلو د شتون په اړه دي او ویلي یې دي چې په هېواد کې هېڅ بهرنۍ ډله فعاله نه ده او ا.ا بشپړ کنټرول لري.
مجاهد له رسنیو سره په مرکه کې زیاته کړه چې په افغانستان کې د وسلهوالو ډلو د شتون ادعا د ا.ا د واک ته رسېدو دمخه هم راپورته شوې وه.
په بشکیک، د شانګهای د همکارۍ سازمان د سرمشریزې په څنډه کې په یوه غونډه کې، د پاکستان او تاجکستان د کورنیو چارو وزیرانو په افغانستان کې د ترهګرو د پټنځایونو او د نشهیي توکو د تولید د زیاتوالي په اړه جدي اندېښنه څرګنده کړه.
دوی ادعا کړې چې شاوخوا ۲۵ ترهګرې ډلې په افغانستان کې فعالې دي او دا وضعیت یې د سیمې امنیت ته ګواښ ګڼلی دی. دوی د ترهګرو د روزنیزو مرکزونو او د نشهیي توکو د قاچاق په اړه هم اندېښنه څرګنده کړې ده.
اسلاماباد په مکرر ډول د تحریک طالبان پاکستان (TTP) د خپلو اصلي امنیتي ګواښونو څخه ګڼلی او ا.ا یې دې ډلې ته د خوندي ځایونو د برابرولو تورن کړی دی.
پاکستاني چارواکي ادعا کوي چې د ا.ا له واک ته رسیدو راهیسې، په پاکستان کې د ترهګریزو بریدونو شمېر خورا زیات شوی دی، چې ځینې یې د افغانستان له خاورې څخه تنظیم شوي دي.
بلخوا ا.ا دا تورونه رد کړي دي او ټینګار کوي چې په پاکستان کې ناامني یوه داخلي مسله ده او له افغانستان سره هېڅ تړاو نلري.
