په بنګله دېش کې یوه سنډا د ټولنیزو رسنیو کاروونکو او ځایی اوسېدونکو لخوا د خپل ویښتانو رنګ او ځانګړي مخ له امله پراخه پاملرنه راجلب کړې. دا سنډا چې د لوی اختر له رارسېدو مخکې پلورل شوې وه او ټاکل شوې وه چې د لوی اختر د قربانۍ په مراسمو کې حلاله شي، خو د ځایي مسوولانو له لوري له قرباني کېدو وساتل شوه.
د العین فارسي په وینا، دا سنډا شاوخوا ۷۰۰ کیلوګرامه وزن لري، ډهاکه ته نږدې په یوه فارم کې ساتل کېده. د څارویو ځانګړې بڼه، په ځانګړې توګه د هغې د ښکرونو ترمنځ طلايي ویښتان، ډېری خلکو ته د دې لامل شوي چې دا سنډا د امریکا ولسمشر ډونالډ ټرمپ سره پرتله کړي او د هغه په نوم یې پرې اېښی دی.
د دغې سنډا شهرت هغه وخت زیات شو کله چې د هغې د ویښتانو مینځلو او سټایل ورکولو ویډیوګانې په ټولنیزو رسنیو کې خپرې شوې. له هغې وروسته، ډېری خلک فارم ته د څارویو لیدلو او عکسونو او ویډیوګانو اخیستلو لپاره راغلل.
د فارم مالک وايي چې څاروی یو ارام چلند لري او د هغې ساتنې ته ځانګړې پاملرنه کیږي. د هغه په وینا، د فارم کارکوونکي په ورځ کې څو ځله دغه سنډا مینځي او د هغې ویښتان پرې کوي ترڅو دا پاک او ځلېدونکی وساتي.
پر انټرنیټي پاڼو د دغې سنډا له مشهوره کېدو وروسته چارواکو پرېکړه کړې چې مېښه به د قربانۍ پر ځای د بنګله دېش په ډاکه کې یوه ژوبن ته ولېږدوي.
