هېواد کې د پرلهپسې ورښتونو په دوام، د پېښو پر وړاندې د مبارزې چمتووالي ملي ادارې ویلي چې په تېرو ۴۸ ساعتونو کې د بېلابېلو طبیعي پېښو له امله ۱۳ کسان مړه او ۹ نور ټپيان شوي دي.
د دې ادارې ویاند، حافظ محمد یوسف حماد ویلي دا کسان په کابل، بامیان، پکتیا، غور، بادغیس، بلخ، سمنګان، سرپل، جوزجان او بغلان ولایتونو د ورښت، سېلابونو او ځمکې ښویېدو له امله مړه او ټپيان شوي دي.
د حماد په وینا چې په دې موده کې ۹۴ کورونه په بشپړ او ۱۰۷ کورونه په نسبي توګه ویجاړ شوي دي او ترڅنګ یې ۱۷ د اوبو او برېښنا شبکې او ۱۲ کیلومتره سړکونه هم ویجاړ شوي دي.
د پېښو پر وړاندې د مبارزې چمتووالي ملي ادارې ویاند همداراز ویلي چې د وروستیو ورښتونو له امله د ۵۰۰ باغونو حاصلات هم زیانمن شوي او ۲۳۱ څاروي هم تلف شوي دي.
د یادونې وړ ده چې د تېرې وري میاشتې له شپږمې تر اوسه پورې په هېواد کې د بېلابېلو طبیعي پېښو له امله ۲۲۷ هېوادوالو ژوند له لاسه ورکړی دی.


