د کانونو او پټرولیم وزارت ویلي، چې د ټاپي ګازو نللیکې پروژې د رغنیزو چارو په برخه کې د پام وړ پرمختګ شوی دی. د دغه وزارت د خبرپاڼې لهمخې تر اوسه ۴۴ کیلومټره نللیکه غځول شوې چې دا د پروژې د چارو د چټکتیا برخه کې یو مهم ګام بلل کېږي.
د کانونو او پټرولیم وزارت نن(شنبه، د اپرېل ۱۸مه) په یوې خبرپاڼې کې ویلي، چې د ټاپي ګازو نللیکې پروژې د رغنیزو چارو په برخه کې د پام وړ پرمختګ شوی دی.
دغه وزارت همداراز وایي، په وروستیو میاشتو کې د دې سترې اقتصادي پروژې کارونه چټک شوي، چې د عملي چارو بهیر په ښه توګه مخته روان دی. تر اوسه پورې ۴۴ کیلومټره نللیکه غځول شوې ده، چې دا د پروژې د چارو د چټکتیا په برخه کې یو مهم ګام بلل کېږي.
خبرپاڼه زیاتوي، چې سربېره پر دې د ۱۲۴ کیلومټرو په اوږدوالي نوره سیمه هم د نللیکې د غځولو لپاره چمتو شوې ده، د کارونو دوام او پرمختګ ته په کتو، تمه ده چې د یادې پروژې د هرات ولایت برخه په ټاکلي وخت بشپړه او ګټې اخیستنې ته وسپارل شي.


