د وردګو مسوولین وایي، د یاد ولایت جغتو ولسوالۍ کې د سېلابونو او کور نړېدو په پېښو کې څلور کسان مړه او درې نور ټپيان شوي دي.
د دغه ولایت مقام رسنیز دفتر د خبرپاڼې له مخې چې دا پېښې د جغتو ولسوالۍ باریکاب حوزې کوزه علانه او کنجغتو کلیو کې شوې دي.
د خبرپاڼې له مخې چې په دې پیښو کې ۳ کسان د کور نړېدو او یو نفر د سیلاب له امله شهیدان شوي او ۳ نور کسان ټپیان دي، په شهیدانو او ټپیانو کې ښځې او ماشومان شامل دي.
دا په داسې حال کې ده چې له تېرو څو ورځو راهیسې په هېواد کې د ورښت او سېلابونو له امله نږدې ۸۰ کسان مړه او شاوخوا ۱۳۰ نور ټپیان شوي دي.
د اسلامي امارت د پېښو پر وړاندې د مبارزې چمتووالي ملي ادارې ویلي چې د وروستیو ورښتونو له امله زرګونه جریبه کرنیزه ځمکه ویجاړه او زرګونه کورونه هم نړېدلي دي.
بلخوا د ټرانسپورټ او هوایي چلند وزارت د هواپېژندنې ادارې سبا په ټول هېواد کې د شدید ورښت او سېلابونو راوتلو په اړه خبرداری ورکړی دی.


