د فلسطین روغتیايي چارواکو اعلان کړی، چې د غزې په ځینو برخو باندې د اسراییلو په وروستیو بریدونو کې د یوه ماشوم په ګډون شپږ کسان وژل شوي او څلور نور ټپیان دي.
د فلسطین روغتیايي چارواکو نن(یکشنبه، د مارچ ۲۹مه) اعلان کړی چې د غزې په ځینو برخو باندې د اسراییلو په وروستیو بریدونو کې شپږ کسان وژل شوي او همداراز څلور نور ټپیان شوي دي.
په وژل شویو کې یو ماشوم هم شامل دی.
نړیوالو رسنیو راپور ورکړی چې د اسراییلو پوځ نن سهار د غزې په سویلي برخه کې د خان یونس په سیمه کې د پولیسو دوه پوستې په هوايي بریدونو سره په نښه کړې.
د راپورونو له مخې، په غزه باندې د اسراییلو د بریدونو قربانیانو کې درې پولیس افسران او درې ملکي وګړي شامل دي.
باید وویل شي چې له هغه وخت راهیسې چې اسراییلو د تېر کال په نومبر کې په غزه کې اوربند ته هوکړه کړې وه، په بریدونو کې ۶۹۲ فلسطینیان وژل شوي او ۱۸۹۵ نور ټپیان دي.


