د شمالي کوریا مشر «کیم جونګ اون» د هیواد په پارلماني ټاکنو کې د واکمن ګوند له بریا وروسته یو وار بیا د دغه هیواد د دولت رییس په توګه ټاکل شوی دی.
دا خبر رویټرز خبري اژانس نن (دوشنبه، حمل ۳مه) د شمالي کوریا د دولتي کوریا مرکزي خبري اژانس (KCNA) په حواله خپور کړی دی.
د راپورونو له مخې، د شمالي کوریا مشر له ټاکنو څخه یوه اوونۍ وروسته د «خلق عالي اسمبلۍ» یا د هیواد پارلمان کې خپله لومړۍ غونډه کړې ده.
دا غونډه پرون (یکشنبه، حمل ۲مه) په پیونګ یانګ کې شوې او د سوسیالیستي اساسي قانون د تعدیل او بشپړولو، د دولتي چارو د کمیسیون د رییس او نورو دولتي مشرتابه ادارو د ټاکلو په څیر مسایلو پکې بحث شوی دی.
د شمالي کوریا د لومړي وزیر او نورو مشرتابه پوستونو د ټاکلو سربیره، تمه کیږي چې د سوسیالیستي اساسي قانون د تعدیلاتو او بشپړولو په اړه به هم بحثونه وشي.
د دې ترڅنګ به د شمالي کوریا د خلق اسامبلې د هیواد پر پنځه کلن اقتصادي پلان بیاکتنه وکړي، کوم چې د هیواد د واکمن ګوند د کانګرس په جریان کې اعلان شوی و.
د شمالي کوریا پارلماني ټاکنې تېره اوونۍ ترسره شوې، او د کیم جونګ اون په مشرۍ واکمن ګوند وکولای شول چې ټولې څوکۍ وګټي.
