د انګلستان حکومت اعلان کړی، چې د افغانستان، کامرون، میانمار او سوډان د اتباعو لپاره د زدهکونکو ویزو ورکول به وځنډوي.
د برتانوي چارواکو تېره ورځ(سهشنبه، د مارچ ۳مه) په ویزو باندې نوي محدودیتونه اعلان کړل. د کورنیو چارو وزارت په وینا، د څلورو هېوادونو د اتباعو لپاره د زدهکونکو ویزو ورکول به وځنډول شي، دا پرېکړه چې د لومړي ځل لپاره په دومره لویه کچه پلي کیږي.
د دې سره، افغان اتباع به د کار ویزو ته د لاسرسي څخه هم منع شي. د کورنیو چارو وزارت په یوه بیان کې وویل چې د قانوني چینلونو له لارې د پناهغوښتنې د غوښتنلیکونو زیاتوالی د دې پرېکړې لامل شوی.
د کورنیو چارو وزیر ټینګار وکړ چې د هغه هېواد به د جګړې او ځورونې څخه تښتیدلو خلکو ته د پناه ورکولو ته دوام ورکړي، خو زیاته یې کړه چې د ویزې سیسټم باید په داسې ډول ونه کارول شي چې د هغې اصلي هدف سره په ټکر کې وي. هغه ادعا وکړه چې د دې هېوادونو ځینو اتباعو د انګلستان د کډوالۍ سیسټم څخه ناوړه ګټه پورته کړې ده.
دا پرکړه په داسې حال کې کیږي چې په انګلستان کې د کډوالۍ په اړه بحثونه زیات شوي، د کډوالو د راتګ په اړه ټولنیز او سیاسي حساسیتونه زیات شوي دي.
حکومت په دې وروستیو میاشتو کې هڅه کړې چې د کډوالۍ او پناهغوښتنې په اړه سختې پالیسۍ پلي کړي، دا هغه موضوع ده چې په کور دننه او بهر کې یې پراخ غبرګونونه راپارولي دي.


