د بهرنیو چارو چارو وزارت دویم سیاسي رییس، وایي چې امنیتي او دفاعي ځواکونو د وضعیت د مهار لپاره متقابل او دفاعي اقدامات کړي، او ورسره موازي فعاله ډیپلوماسي هم په جدي توګه پر مخ وړل شوې ده.
ښاغلي جلالي په اېکسپاڼه لیکلي چې د ملي ګټو او ملي امنیت د خونديتوب لپاره ټول مشروع او مسوولانه وسایل په هممهاله او همغږي ډول کارول کېږي.
د نوموړي په وینا چې له پاکستان سره د وروستیو نښتو په اړه د ترکیې، قطر او سعودي عربستان د بهرنیو چارو له وزیرانو سره مفصلې مشورتي خبرې شوي او د افغانستان رسمي دریځ ورسره شریک شوی دی.
بلخوا یو شمېر هېوادونو د افغانستان او پاکستان ترمنځ د سملاسي اوربند غوښتنه کړې او له دواړو هېوادونو یې غوښتي خپل اختلافات او ستونزې د خبرو له لارې حل کړي.
د افغانستان او پاکستان ترمنځ له تېرې وړمې شپې راهیسې په سرحدي سیمو کې نښتې پيل شوې دي چې د راپورونو له مخې تر دې دمه پاکستاني لوري ته درانه تلفات اوښتي دي.
تازه په ننګرهار کې د پاکستان یوه جېټ الوتکه نسکوره او پیلوټ یې هم ژوندی نیول شوی دی.


