له ایران او پاکستان څخه د افغان کډوالو د جبري رالېږلو په دوام، پرون له دغو هېوادونو څخه ۶۲۶ کډوالې کورنۍ راستنې شوي دي.
د دې ادارې په راپور کې ویل شوي چې پرون د نيمروز د ورېښمو پله لارې ۶۶، د هرات د اسلام کلا له لارې ۶، د کندهار د سپين بولدک له لارې ۱۰۸ او د ننګرهار د تورخم له لارې ۴۴۶ کورنۍ هېواد ته راستنې شوې دي.
په راپور کې ویل شوي چې ۱۰۷۳ کورنۍ خپلو سيمو ته لېږدول شوې، ۱۶۶۳ راستنو شويو ته سيمکارتونه او سلګونو کورنيو ته مرستې وېشل شوې دي.له تېرو څو کلونو راهیسې له ګاونډیو هېوادونو څخه د افغان کډوالو جبري راستنېدل په بېسارې توګه زیات شوي دي.
بلخوا د دغو هېوادونو چارواکو ویلي چې دوی له خپلو هېوادونو څخه ټول افغان کډوالو وباسي.
په ورته مهال ګڼو نړیوالو ادارو او پر بشري حقونو د څار بنسټونو له پاکستاني حکومت غوښتي چې د کډوالو ایستلو ته د پای ټکی کېږدي.
د ویلو ده چې له تېرو پنځو میاشتو راهیسې له ایران څخه هم د افغان کډوالو راستنېدل په بېسارې توګه زیات شوي دي.


