د معیار او کیفیت ادارې په تورغونډۍ بندر کې د ۲۴٫۵ ټنه بېکیفیته قیرو له مستردکېدو خبر ورکړی دی.
د دې ادارې د خبرپاڼې له مخې چې دا اقدام د کورنیو بازارونو د خوندیتوب او د مصرفوونکو د حقونو ملاتړ په موخه شوی دی.
د معیار او کیفیت ادارې ویلي چې دې محمولې له کورنیو معیارونو سره مطابقت نه درلود او له هراړخیزې څېړنې او د کیفیت له کنټرول وروسته بېرته صادروونکي هېواد ته ورګرځول شوي دي.
“د معیار او کیفیت اداره ټینګار کوي چې د هېواد په ټولو بندرونو کې د وارداتي توکو د کیفیت د تثبیت او کنټرول پروسه په شفافه، منظمه او پرېکنده توګه روانه ده او د بېکیفیته، ناڅرګندو او د خلکو روغتیا ته د زیان رسوونکو توکو د واردولو په وړاندې به هېڅ ډول نرمښت ونه ښودل شي.”
یاده اداره یو وار بیا له ټولو سوداګرو او واردوونکو څخه غوښتنه کوي چې هېواد ته د توکو له واردولو وړاندې کورنیو معیارونو ته جدي پاملرنه وکړي او د یوه سالم او باکیفیته بازار په رامنځته کولو کې له دې ادارې سره همکاري وکړي.
د معیار او کیفیت ادارې تر دې مخکې هم بېلابېل کمکیفیته توکي مسترد کړي وو.


