تېره شپه په کاپیسا ولایت کې پر یو کور د غر نړېدو او کاڼي پرېوتو له امله څلور کسان مړه او شپږ نور ټپیان شوي دي.
د دغه ولایت امنیې قوماندانۍ مسوولینو ویلي چې دا پېښه د کاپیسا مرکز اړوند په «الیاسخېل شُوخِی» سیمه کې شوې ده.
د خبرپاڼې له مخې چې په دې خونړۍ پېښه کې دوه کوچني ماشومان، یوه مېرمن او یو سړی مړه شوي او د دریو ښځو او دریو سړیو په ګډون شپږ کسان نور ټپیان شوي دي.
د سرچینې په وینا چې ټپیان له خاورو را ایستل شوي او د درملنې په موخه روغتون ته لېږدول شوي دي.
که څه هم تر اوسه د دې پېښې لامل نه دی ښودل شوی، خو په افغانستان کې تر دې مخکې هم هغه کورونه د ورته پېښو له امله ویجاړ شوي چې معمولاً د غرونو په لمن یا کړنګونو کې اباد شوي وي.
د یادولو ده چې په هېواد کې د غرونو د ښويېدو ستر لاملونه ځمکلړزې، بارانونه او نورې طبیعي پېښې هم بلل کېږي.
بلخوا کارپوهان وایي چې د هېواد په ځینو غرنیو ولایتونو کې ډېر کسان په داسې سیمو کې اوسېږي چې هره شېبه د غرونو د نړېدو له ګواښ سره مخ دي.


