د کور او ښار جوړولو وزارت په مشرۍ د دایمي مېشتېدنې کمېټې د تېرې اوونۍ په ترڅ کې یو شمېر ولایتونو کې راستانه شوو کډوالو کورنیو ته د ځمکو د نمرو د وېش بهیر د منظور شوي تفصیلي پلان له مخې په منظم ډول ترسره کړ.
په دغه لړ کې، په کونړ کې (۱۵۵) راستانه شوو کډوالو کورنیو ته د ځمکو نمرې وېشل شوې دي، چې په دې سره په یاد ولایت کې د وېشل شویو نمرو شمېر تر دې مهاله (۵۰۶) کورنیو ته پورته شو.
همداراز، په ننګرهار کې (۵۷۰) راستانه شوو کډوالو کورنیو ته د ځمکو وېش بشپړ شو چې مجموعاً تر دې دمه (۱۲۰۳) کورنیو ته د ځمکو نمرې سپارل شوې دي.
په ورته مهال، کندز کې (۱۰۹) راستانه شوو کورنیو ته د تفصیلي پلان له مخې د ځمکو وېش ترسره شو، چې په دې سره د یاد ولایت ټولیز شمېر (۹۲۰) کورنیو ته ورسېد.
سربېره پر دې، په زابل کې هم (۶۱) راستانه شوو کډوالو کورنیو ته د ځمکو نمرې د ټاکلي پلان مطابق ووېشل شوې.
په ټوله کې، د همدې تېرې اوونۍ په ترڅ کې (۸۹۵)راستانه شوو کډوالو کورنیو ته د ځمکو وېش ترسره شو او په عمومي ډول تر دې مهاله په بېلابېلو ولایتونو کې (۶۴۳۷) کډوالو کورنیو ته د دایمي مېشتېدو په موخه د ځمکو نمرې سپارل شوې دي.
باید وویل شي چې تر دې وړاندې هم د هېواد یو شمېر ولایتونو کې کډوالو د ځمکو وېش لړۍ پيل او دایمي مېشت ځایونه وېشل شوي دي.


